Federal Government don beg Petroleum and Natural Gas Senior Staff Association of Nigeria (PENGASSAN) make dem suspend di nationwide strike wey dem plan because of di alleged mass sack of Nigerian workers for Dangote Refinery.
For statement wey come out on Sunday, Minister of Labour and Employment, Muhammad Dingyadi, talk say di ministry don start moves to settle PENGASSAN and di refinery management.
E confirm say dem don invite both parties come for one conciliation meeting for im office on Monday.
PENGASSAN bin don tell dia members across di country make dem stop work from midnight September 28, accuse di refinery say dem dey do anti-labour things and replace more than 800 Nigerians with foreign workers.
Di union talk say di kain action no follow constitution and e dey against labour laws.
Dingyadi warn say if petroleum sector enter strike, e go cause revenue loss, put Nigerians for hardship and even disturb national security.
E come beg PENGASSAN make dem cancel di strike plan so mediation fit happen for peaceful ground.
